الخميس، 27 مايو 2010

سواليييف

بسم الله الرحمن الرحيم



حلو الصباح..دام القلوب اللي تعز الروح موجوده

و حلو العبير اللي يذكرنا بغلاهم

==

الصورة مالها خص...لكن واااايد اعجبتني ....ما شاء الله

===

لا شئ كما الوطن..و الأهل..و التواجد بينهما..

لكن..لنجلب جزءا من الواقع...هناك شئ ما في الغربة...ينبت بداخلي..

لا يتساوى في" الغلا" مع الأوليين....لكنه موجود..

أ هي تلك البلاد التي أحمل ملف طوله 4 سنوات بإسمها في مجلد حياتي ؟

أ هم أناس كتبوني شخصية في قصة حياتهم .. و العكس ؟

أم هي نفسي التي كانت تهيم في وادي له صخوره و طبيعته...و أصبح عليها أن تهيم في وادي آخر و بطريقة أخرى ؟

!!

يسألوني..." خلاص افتكيت؟! ما في ردّه هناك؟ "

أقولهم.. " أي الحمدلله..ان شاء الله ما في رده لها للدراسة...لكن لا بد اني برجع لها.... سياحة :) "

أشوف في عين البعض "الفرح"... في عين البعض "الفخر"...و في عين البعض...." اييييي جيت للصج و الكراف"

==

ضعفت و لا متنت؟!؟!

يسألوني...فأقول على طول " يستحسن اني اكون ضعفت"...يردون..." لا فعلا ضعفت"

بعدها بساعه أدخل البيت و تقول لي اختي " كأنه طلعت لك كريشه!! "

!! رسوني على بر يا ناس >>> يستحسن اكون ضعفت :)

==

أحسن ما في ال

Jet lag

إني أقوم الصبح و أتريق مع أمي و أبوي...

و أسوأ ما فيه أني أرقد 4-5 ساعات ف اليوم بس لمدة 3 ايام

و اليوم الرابع أشبك 12-14 ساعة نوم ....

ما في حل وسط ؟!!!!

==

أصوات الصبح.. الحركة ف المطبخ... قناة المجد و أمي مطوله ع التي في حدّه...

أبوي و هو يكلم "الفور مان " و يوصيه ع التليفون...

إضاءة الشمس ف الصالة... شاي الحيلب (كرك)..

و القطوة و هي "تتمخطر ف الحوش"

كل هذا يرسم ابتسامة على محياي..

و بداخلي صوت يقول برضا...

" الحمدلله ..انا هنا....من جديد "

==

اليهال استانسوا ع الطيارات ( كايت )... و الحلويات >> الحلاوة المصاص الكبيييير اللي كانوا يجيبونها من لندن قبل...تذكرونها؟

"حلاووو" ع قولة حبايبي الكويتين :)

==

المشاريع القادمة:

- انتظر الرد من الوزارة على الموافقة او عدمها بخصوص موضوع الماجستير

- ابي ابدا اصور و اكتشف الجانب " الفوتوغرافي" اللي فيني..

ببوق كاميرا اختي...اقصد بستلفها...و بشوف ايش يطلع معاي

- لغة الاشارة للحين ف خاطري

- ابي ادخل نادي الفروسية

- ابي اشتري سيارة... لكن هذا القرار مؤجل لحين البت في موضوع الماجستير

- ابي انزل خاطرة جديدة :)

- اذا انتوا تحاتووون نفس بعض اللي حولي.... " التفكير" في موضوع الزواج مؤجل لي اعرف راسي

من كرياسي..و لحد ما تترتب اموري الحالية

==

هههههههاااي ..... المفروض الشغالة توصل اليوم...لكنها أجلت الرحلة بدون احم و لا دستور..

خل نروح نواسي الوالدة ف المصاب الجلل...

==

الريوق وصل.....حبيت اصبح عليكم بالخير..

لا تنسون تقرون سورة الكهف...و تكثرون من الصلاة ع النبي..

صلى الله عليه و سلم


يا الله

اتركم في أمان الله


تحياتي

راشد

12 نثروا جنونهم:

ميمة السبيت يقول...

* حي الله الباش مهندس .. شوف هذا عيب الغربة يبيلك سنة تتأقلم عليها أول ماتروح و يبيلك سنتين عقب ماتخلص عشان تتأقلم على وضعك اليديد ابتداءاً من لخبطة النومة .. الله يعينك و يخليلك الوالد و الوالدة و يوفقك

شاي الضحى يقول...

ههههههه

قريت البوست حسيت انك ضايع بالحياة الجديده "البطاله" لاني انا عايشتها الحين بس مو ضايعه ههههه

ان شاءالله ايام وتعدي وتكمل الماجستير

:)

Om Hrooby يقول...

اظني اقدر أقول مسا الخير ..
احلى مافي الموضوع كله (الكرك)لها رنة غريبة هالكلمة ..واايد أحبها

..
حلو الإحساس بالإنتماء من جديد لعالم ابتعدت عنه أربع سنين ..تحس كل شي يبعث بخاطر صدى يرسم ابتسماتك ..ممكن غيرك اللي كانوا موجودين مايحسون بها كثرك الحين لانه شي فقدته والحين استرجعته ..
..
الله يوفقك ويا الماجستير ..ويقدرك تحقق أهدافك اللي حطيتها لنفسك ..وتترتب أمورك ..

تحيتي~

سلة ميوّة يقول...

تدري...
قريت البوست

وانا متربعه بالصالة ويمي الوالده ربي يحفظها حاطه على اقرأ
والعريفي يسولف واهي
اتحن علي..
اسويلج جاي اخضر:)
وانا اقولها
يما مابي قاعده اقرا..
واترد اتقول..اسويلج جاي...


وصلت ل جملة كرك..
جان اقولها يمه ابي كرك...

قالت لي بالحرف...

ماعندنا ريمبو :)

هيهيهيهيهيه


المهم:)

تبي الصج..
هذا أحلى بوست...طعمه غير...

لحنه غير...

وفي الكلام غير...قريت وانا عيوني ملونة...احس انك كتبته بعفوية...

جنك ضعفان:P

شي عجيب هالبوست ربي يديم عليك احساس الإستقرار..
عن تجربة..
كانت اول ليلة لي في الكويت
من بعد ست سنين غربة

غير...
كانت عباره عن 12 ساعة
سويت فيهم كل شي...سويت فيهم كل شي..

وكان الشعوربالأمان روعة...وحظن أمي روعه...وليتات الشارع رووووعه:)

حاسه فيك...



ربي يوفقك ان شالله...
ننطر صورك على نار


لغة الإشارة ..ان شالله راح ادش دورة في شهر 9 احجزلك معاي؟؟




ربي يونسك ويطمن قلبك وقلب كل اللي يحبونك


ودّي

حَافِـيَةُ الَقَدمَيّـنْ ولِبَاسِي المَطـرْ يقول...

بتتعود كلها جم يوم وتتأقلم
الحياه مع الاهل مفعمه
صراخ , لويه , سوالف , وناسه

بس حبيت اسألك جم سؤال عن الغربة
ماعندك مانع ؟
,

@alhaidar يقول...

مبروك على التخرج وألف الحمد لله على السلامة مرة ثانية :)

وانشالله تكمل الماجستير والدكتوراة بعد ..

تحياتي ..

مهرة سالم يقول...

السلام عليكم ورحمة الله وبركاته...
الله يعين الوالده الشغاله مهمه بالصيف ..
.....
شيئ طبيعي هاللخبطه بعد العوده
من سفر طويل ..
أن شاء الله موفق أخوي
والله يسهل أمورك..
...
دمت بخير

خاطراتي يقول...

مبرووك التخرج
والله ينولك اللي في بالك وتكمل الماجستير والدكتوراة


وبعد يوفقك ببنت الحلال اللي تسعدك ويرزقك الذرية الصالحة....


لمة الاهل متعة وراحة الله يديم هالنعمة..

عجبني البوست و ان شا الله تكون دوم بهالهمة

وحلو النوم بعد التعب شوي وبتتأقلم
وبتبدي حلم وأمل جديد بنشاط..

ضعيف ولا متين ما يهم المهم الصحة طيبة

موفق

jonoon 3aqel يقول...

اختي ميمة السبيت

الله يحيك... و جزاك الله خير

بمجرد ما تتوضح الامور مع الوزارة اكيد اني بتعود لكن لي ذيك الحزة...خل اتونس لي شوي :)

الله يخلي لك غالينك يا رب

=====================================

اختي شاي الضحى

ههههه
الله يسهل و يكتب الخير لنا و لكم

لا تتعودين ع البطالة...لازم تشوفين لك شي
:)
الله يعينك

===================================


اختي ام حروبي

اي و الله...الكرك من الاشياء اللي افتقدتها...طبعا تعلمت اسويه...لكن يتم شغل البيت غير

الحمدلله على كل حال
و الله يوفقنا و اياكم لما يحب و يرضى


===================================


اختي سلة ميوه

هههههههه ربي يحفظ الوالدة و يخليكم لبعض
الكرك ما يضبط بدون ريمبو...وهي صاجة


هذا البوست كان رايق...وهذا سبب الاحساس المختلف :)
الاستقرار نعمة..لكن للحين الوزارة ما اتخذت فيني القرار.. و هذا يمنعني من اني اتخذ اي خطوة بخصوص لغة الاشارة او سفرة للسياحة :)

الله المستعان..و الله يكتب اللي فيه الخير
لنا و لكم و للجميع يا دكتوره :)



تحياتي للجميع

سلة ميوّة يقول...

there is a home work in my blog to do...

please chick my blog

:) have anice day

jonoon 3aqel يقول...

أختي حافية القدمين

:) اهلا...
هي مسألة وقت لا اكثر...

اكيد ما في مانع...
اسألي اللي تبين... و الله يقدرني ع الجواب و لإفادة


===================================
==

أخوي احمد

الله يبارك في حياتك..و يارب تبلغ خير في البنات و تشوفهم و هم مرتاحين و مستانسين في حياتهم العلمية و العملية

===================================


اختي نهار

اي و الله... الله المستعان...
بدأنا نتعود :)

الله يخليلك غالينك و يسعدك
:) شكرا لتواجدك اختي

===================================


اختي خاطراتي

الله يبارك في حياتك..و عقبال ما تفرحين في كل غالي على قلبك

شكرا لتواجدك اختي


تحياتي للجميع

AL Ro0oR يقول...

http://al-ro0or.blogspot.com/2010/06/p.html

التاج الجديد ينتظرك ^_^