بسم الله الرحمن الرحيم
" تبسمك في وجه أخيك..صدقة"...صدق رسول الله صلى الله عليه و سلم
======
مجرد ساعات تفصلني عن السفر............ المطار..قاعة المسافرين....و الطائرة..
من شهر بالضبط خطت قدمي على أرض وطني..
من شهر كنت بموووووت عشان أرجع..
و اليوم ...أودّع...
المشاعر "منضبطة" و "تحت السيطرة" و لله الحمد...
السفر كأنه جاء مفاجئ!!!
بعض اخواني فعلا تفاجؤا لما سلمت عليهم و أنا أقولهم" ترا أنا بكره مسافر"
و حتى بالنسبة لي...
يمكن لأن ماعندي تجهيزات..ف مش مهتم اني اعد نفسي و أرتب اغراضي
و " جك بم" إلا يوم السفر يتنحنح عند الباب :)
كنت راد بشنطه كبيره..عشان الأغراض اللي هلي طالبينها..
و رايح بها لأني راح احتاجها و أنا راجع شهر 5 بالسلامة مع " الشهادة الكبيره" ان شاء الله..
عاد برجعها شبه فاضية هههههه
مضحكني هالوضع...
=======
طبعا مخططاتي لم تتحقق بالكامل>>> تذكرونها؟!
التصوير >>>> اوكي
الكتاب >>>> للحين أقراه...و الله أعلم متى أنهيه
لغة الإشاره >>>> لأ...و ألف لا..و بسوي "اكس" على المركز الاجتماعي الثقافي للصم و البكم ( اشلون اقدر اسوي وجه معصب بحروف الكي بورد)
=====
أمس كنت أنا و 3 من ربعي نتمشى ف سوق واقف..
و أبدا مو حاطين بالنا...
إلا بينا و بين ناس مجتمعة مسافة مترين..
شفنا...إلا بنت عربية مغمى عليها...
و واحد ماسكها..." نور....نور" و يحاول يوعيها...
حواليهم يمكن 15 شخص...
ما في حد تحرك و أتصل 999!!!!!
أسألهم: اتصلتوا؟؟؟ ...............إلا واحد يقولي: اتصل..اتصل...هذولي ما منهم فايده
كلمتهم... >>> أول مره اتصل :)
و المكالمة خذت لها دقيقة..سكّرت...
و اللي ماسكها للحين يعطيها "طراقات" يبي يصحيها...
واحد مد لي جريدة مطوية عشان نهوي عليها...
و احد يقول شممها بصل!!!
واحد يقول شيلوها عن الدرب!!!
و رفيجتها تقول لها.." خلاص نور...يا الله قومي" !!!!!!!!!!!!!
عاد أنا أبي اسوي فيها بطل... خاصة ان الفرصة جات لأجرب و أمارس العشق الأزلي..." الطب"
مسكت يدها..الحمدلله في نبض...
أقولهم لا ترفعونها..خلوها ممددة بما أنها لسّه ما صحت...
لكن لا حياة لمن تنادي...
وقّفوها...قعدوها ع الكرسي...و هي للحين مغيبة..فاقده الوعي...
يعطونها ماي و يقولوا لها " اشربي"!!!!!
يا اخي مغمى عليها...و لسه ما وعت...تشرب ماي اشلووووووووون؟؟؟
هل كيف؟!؟!؟!
أقول لرفيجتها امسحي على وجهها بالماي...ما ادري اسمعتني...ما اسمعتني..
المهم انها ما دارت لي بالي...
أخذت الماي من عندها...بللت يدي....و مسحت بيدي على وجه البنت....>>>> لا احد يفهم غلط...
و الحمدلله وعت...
و مره ثانيه ما اسمعوا كلامي...و بمجرد ما وعت..قوّموها و دخلوها داخل المطعم...
و جا الاسعاف خلال مممم 10 دقايق...
زيييييييييييين
أنا الحين ليش اقولكم السالفة....
لأن:
1- ما قلت لخواتي للحين...و لا راح اقولهم عشان ما تجيني "زقرة" = "غيظة" = "زفّه" = "تهزيئة"
لأني مسحت على وجهها...
لما أفكر...أقول و أنا ليش ما قلت حق اللي يعطيها طراقات يمسح عليها...
لكن السبب هو:
2- حشرة الناس...و العدد الزايد...و الأصوات..و كل واحد يفتي من صوب..و يأمر من صوب..
لكن...ما أحد يتخذ القرار و يسوي " الفعل"
ف كان لازم حد step up
و يتصرف...
و بما إني انا مو من هالنوعية...
مستانس لأني هالمرة انا اللي قمت ببعض التصرفات..
3- لازم لما نمر بهالحالة...نرتب أنفسنا قبل...و ما نخجل بأننا نأمر الناس أو نرتبهم في سبيل صحة الحالة المرضية...
و لو ماكان لنا دور..ما في داعي نعيق اللي قاعد يشتغل..
>> بط جبدي اللي قال " وخروها عن الدرب"
>> ضحكني اللي قال " شممها بصل"
التصرف المثالي: ( و يارييت أطباء المدونات يصححون لنا)
1- نتصل بالإسعاف...فورا...
2- نتأكد من نبض و تنفس فاقد الوعي
3- نخلي المصاب مكانه...و نحط ( نضع ) تحت الرأس شي ك وسادة
4- نحاول نوعي الشخص بمناداته او هزّه بخفّه..أو " طراقات" خفيفه
5- اذا ما قام.." ما نشربه ماي"... ممكن "نشممه بصل"...و ياريت لما نوصل هالنقطة نكون already وقفنا طراقات.....
ممكن نمسح على وجهه بماء...و ان شاء الله بيقوم..و يفضل ان ما نأكله او نشربه شي
اذا قام...نخليه ممد..عشان يستعيد توازنه و يستوعب ايش صار..
نسأله اذا يقدر يقوم...اذا جاوب بنعم...نخليه يجلس ع الارض بشويش..
بعدها نسأله يقدر يوقف...اذا جاوب بنعم...نمسكه و نسنده لحد ما يستريح ف مكان مناسب
ممكن بعد نسأله " شو هو اليوم؟ او تاريخ اليوم؟" للتأكد من انه بوعيه و بذاكرته
6- اذا ما قام...مافي داعي نحركه...نتأكد من ان مجرى التنفس مفتوح...نخليه على جنب لو كان يرجّع و يستفرغ ( اجلكم الله )
و ننطر الاسعاف..
و ان شاء الله ما من شر...
انصحكم بأن تدورون ع النت عن الاسعافات الاوليه في الحالات المختلفة عشان تكونون مستعدين
في حالة - لا سمح الله- احتجتوا
اشوفكم ان شاء الله لما اوصل شقتي المصون
و بدعي لكم جميعا ان شاء الله...
و اسمحوا لنا ان كنا قصرنا او غلطنا في حق أحدكم....ترا بدون قصد
و لا تنسونا من صالح دعائكم
:)
راشد