اليوم كنت مدعو لألقي كلمة في مدرستي الثانوية " سابقا " عن تجربتي في تلك المرحلة
و ما تلاها من فترة قرار و اختيار..بحكم اني و لله الحمد كنت من المتفوقين و اني كنت "دلوع" المدرسين..
جرت الأمور بشكل جيد و لله الحمد.. لكني منزعج "جدا" من موقفين قد يراهم البعض " بسيطين"..
الأول:
كنت مجهز خاتمة بسيطه تلخص كل الحوار... و النقاط اللي لازم الشباب يديرون بالهم عليها..
و ما قلتها...مع ان محتواها قلته اثناء ما تكلمت...لكن يعني تعرفون...لما يتم ذكر بعض الاشياء ك نقاط
تثبت في البال... و قد يستفيد من هذه النقاط اللي ما لقطوها اول مره...
الثاني و هو الأهم:
أحرجت طالبين.... الاول كان يبي يسأل و أنا للحين أجاوب الثاني..
فقلت له بس أجاوب الثاني و أرد لك...لكني قلتها بصوت واطي..و أنا بطبعي أحرك يدي و انا أتكلم..
ف الشباب ما اسمعوني..و انتبهوا ليدي..و بين لهم كأني أأشر له " أسكت"!! و اقعدوا يضحكون
و الثاني رديت عليه بحده شوي..من غير قصد و الله...و قلت له " أنت ما عندك تجربة ف الحياة"...و هذا صادف نفس الوقت
اللي كنت أأشر فيه بيدي اللي كانت كأني اسكت الاول..فانحرجوا الأثنين..
و ما قدرت اعتذر لهم لأن واحد نبهني على هالشي بعد ما طلع الكل...
قويه صح؟؟ لكن و الله من غير قصد...و كان ودي اني ارتقي بفكري و بفكرهم معا...
هالامور تضايقني وايد...بغض النظر كونها بسيطة و لا لأ...
و اتسائل...هل الطرف الثاني مازال يفكر في اللي صار و لا نساه؟ و لا ما افتكر فيه اصلا!!!
اوووف استغفر الله
بعدين....هل كنا احنا مثلهم على ذيك الايام؟؟ ما عجبتني طريقة تفكيرهم و نظرتهم للأمور...مش الكل طبعا..
لكن المفروض يكونون أكثر "نضوجا" و أكثر " منطقية " ...
التعليم:
طبعا هاي مشكله قطر حاليا...و عشان ما اعور راسكم...استخلصت التالي..
أخطاء النظام:
عدم وجود كتاب و منهج يسري على جميع المدارس...بل يتم تحديد مقاييس...و كل مدرّس "يسوي" الملازم لطلبته و اللي تغطي المواضيع
المحددة في المقاييس المذكورة.. هذا يخلي الطالب يحس بالضياع
و ان ماله اساس يمشي عليه
في ثغرة.. و هي نفسية الطالب... الطلبة اللي شفتهم مشحونين بما فيه الكفاية من محيطهم بأن
" النظام المستقل نظام فاشل " بالثلاث""
بينما الخلل هنا يكمن في عدم تعودهم و تهيأتهم و "فهمهم" لمتطلبات النظام الجديد..
و أحد أهم هذه المتطلبات هي:
اللغة الأنجليزية:
...اطلعت على أحد المناهج اليوم... و ليست بالصعبة و لا بالمستحيلة...لكن تخيلوا أجي أدرسكم مادة بسيطة
بالهندي!!! ما احد راح يفهم طبعا...و هاذي هي مشكلة الطلبة مع المناهج لأن لغتهم الانجليزية " الله بالخير"...>>> إلا من رحم ربي..
هناك اخطاء من الطرفين ( الطالب و أهله...و المدرسة و النظام)
و عدم وضوح النظام بما فيه الكفاية..و عدم استقرار و انصاف بعض القوانين هي عقبة ايضا امام تعليم عيال قطرنا..
عشان اختم بدون هذره زايده...لو رجع لي الأمر..
كنت راح أدرس مناهج الحكومة السابقة..بالنظام المستقل...مع تعديلات بسيطة لدمج الاثنين مع بعض
احيانا افكر...اقول ما ادري اذا تخرجت امسك لي مدرسة و اصيير متعدها!!
لكن اللي بيكسروون مياديفي وايد...و ما ودي اطيح ف مشكله مع حد...
و ما ودي اخذ مكان مسؤول و ما اكون قده...
الله المستعان....
===
اليوم ان شاء الله بروح مع اختي المصورة...فازت في مسابقة ال ثاني :)
عاد أنا بروح و بستلم الجائزة بدالها :)
هي تستحي تطلع ع الاستيج...و بتملحس لهم...يمكن يعطوني كاميرا نيكون دعاية و لا تشجيع منهم عشان انا أصور p :
هههههه
===
مازلت متضايق من الموقف اللي صار ف المدرسة :(
لكن يا الله " كل طراق....بتعلومه "
========================
تحديث: لا يفوتكم....غبره غبره.....يعرضون " كونان " على تلفزيون قطر....باااااال
"< المحقق كونان...يسعى جاهدا...لا يخشى المحن...المحقق كونان"
على قولة الكويتين......" شخباري!!!!!!!!!!!"
يا الله...اترككم في امان الله الحين...
مع السلامه
13 نثروا جنونهم:
مساء الخير اخوي
بالنسبه للموقف الأول او الخاتمه عادي المهم انها وصلت لهم الفكره
والموقف الثاني اعتقد انهم كبار مو يهال الي بينحرجون جدام ربعهم وماراح ينسونها بس الكبار يمكن انحرجوا بلحظتها وبعدها افهموا قصدك او نسووها
بس لا يحطون ببالهم انك مغرور ولا شايف نفسك ههههههه
ومبروووك لاختك وان شاءالله تكون اكبر مصوره في قطر :)
اي والله شخباري هههههههه
توني ادري انك ما تقولون "شخباري"!
يعطيك العافيه :>
امم صج موقف "محرج"!! أحيانا تحس انك تطلع و بصورتك الحقيقية بمواقف معينة وتحس انك تندم على تصرف تصرفته حزتها و أنا متفهمة الموقف اللي صارلك وعلى قولتك كل طاق بتعلوم
أنا شخصياً مره صادفني مثل هالشي .. كنت واقفة امام البوابة باسافر وناطرة بالدور واحنا يوم كنا طلبة لازم نسافر على الكويتية والكويتية مشهورة بكثرة المسافرين من دول شرق آسيا!!
المهم ما وعيت الا باللي ياي يصرخ ويدز شخص كبير بالكرسي المتحرك .. يصرخ فينا "هاااي هاااي " ويأشرلنا بيده يعني وخروا!
انا قلت "وين قاعدين؟؟ ليش تصارخ جذي؟"
والا يقولي "مواخزة اصلي افتكرتك هندية!!!"
قلت له حتى لو هندية في اسلوب بالكلام!
اعتذر مره ثانية بس انا انكسر خاطري اولاً لأنه ريال كبير بالسن ما كنت احب اكلمه بهالاسلوب مع انه اهو اللي غلطان بس هم كرهت نفسي لأني رديت عليه!
وعلى المناهج و النظام عندنا وعندكم خير :)
وبالنسبة للمحقق كونان وشخباري << اشفيهم الكويتيين؟ p:
اممممم
اعاني من هالشي
لو 2 يرمسوني فنفس الوقت
وما أبي احرج أو اطنش أي حد فيهم
فاتلفت بين ال2
أحاول أبين لهم إني معاهم
بس لأني ما أحب احرج إنسان ..
ويا ما كانت تصير لي
الكل يبي يرمسني فنفس الوقت ..
><
**********
و عن الموقف .. ما عليك بيمر ومحد بيتذكره ..
بس حلو انه عندكـ ضمير يحاسبكـ :) لانه نادر ما نلقى ناس جذي .. بالعاده ناس تحرج وتجرح بقصد ولا يتأنب ضميرهم
********
المناهج ،، أحس هاي معاناة كل الدول الخليجية
ع حظنا العام طبقوا علينا نظام امتحانات
خارج منهجنا
اللي درسناه
والمشكله فاجئونا بهالشي
ويوم احتجينا قالوا لنا والله لجنة أجنبية حاطين لكم هالامتحان
يعني لو الشغلة صار فيها اجانب هالشي بيفرحهم
:|
الله المستعان
*********
ما شاء الله عليها أختكـ شكلها مبدعه في التصوير :)
ليش ما تحط لقطات من عدستها
علنا نستفيد من تجاربها (;
*******
كونان عشق الطفوولة ..
اممم
انت بس حط ع قناة فواصل
الساعه 4 أو 5 العصر
بتجوف كل الرسومات المغبرة ..
قوم .. وادي الأمان .. و نوار .. وراوية .. والفرسان الأربعه .. ووو باجي الشله ...
******
قواك الله أخووي
تحياااتي
اول شي مبرووووك على فوز اختك .. الله يوفقها يااارب :)
كونان؟ لووول صح حده قديم :)
وموقف المدرسه .. لا تحاتي .. اهم شي انك سويت اللي عليك .. وموضوع الاحراج انت مو قصدك و مو متعمد .. بعد الموقف صار جذي غصبن عنك :)
والتعليم .. عندنا وعندكم والخليج عموما .. لا تعلييييييييييييييق :>
الله يعطيك العافيه اخوي :)
بالنسبة للموقف عااد ضميرك مابيخليك فحاالك >>اسألني صاار لي مووقف وحسيت اني جرحت البنية ..بس ماكان قصدي ..
وما ارتحت لين ما اعتذرت للبنية ..يووم اعتذرت منها ربيعتها قالت لها ظلمتي البنية .. ..بس حسيت برااحة ..
مبرووك لاختك ..عزمووني خيخخ >> ع قولة سمو الاميرة رازة عمرها فكل شي خيخخ
اما عن المنااهج >>خخخ حسيت انك حنيف حسن فكلاامك جنك ااحد عمره فووق ال30 خخ ما شاءالله ..>>يااليت اخواني يعقلوون ..
خيخخخ عيل اتعلم مني اشحالني ..>>واذا حد سوا لك طااف "بخير ربي يسلمني خيخيخ
ودمت فحفظ الرحمن
جنون عاقل
ما أنبلك!
ليلحين اتفكر بالموقف!!!
انت مثلي..
الضمير ذابحك:)
واتظل اتفكر بالموقف وايد لما تهرس بعمرك وتصير مظروبة:)((انا اصيييير))
اتوقع اهما نسو الموضوع...
وصدقني شي عادي انك اتمر بنفس هالموقف...
وشي طبيعي انك تنفعل او تتوتر
ولايهمّك ..اكيد مع الوقت راح تتعلم
وبعدين لازم الواحد يتعلم من أخطاءه
طبعاً انا اعطيك هالنصايح
ويوم الخميس الياي عندي محاظرة راح ألقيها على 50 دكتور ودكتورة
انا أصغرهم...
اممم اعتقد إني راح أتأ تأ من اهني لي شارع الكورنيش عندكم:)
واعتقد إني بعطيهم
بو
آي آآآآآي آآآآي..(مالت باي باي لندن)
واعتقد إني راح أصير طماطه..والله يستر لا اسكت دكتور والا أزفه :) اعرف سوالفي لي توترت....
راشد ...بوست حلو حيوي...وقريب للقلب
إي ومبرووك لإختك وعساك اتهنى بالكامرا:)
انتظر بوستك القادم ودّي
أختي شاي الضحى
:)
الحمدلله نسيت الموضوع...كان مغلبني امس بس
و الله يبارك فيك...
>>> احنا ما نقول " شخباري"..بس وايد عاجبتني هالكلمة للتعبير عن شي قديييييم
:)
ممكن نضيفها للقاموس..و اشوي اشوس تنتشر
دمتي بحفظ الله و رعايته
===================================
أختي انجنيره
موقفك اصعب لأن في احد معاه الحق.. و تصرفك صح..و كونه كبير ما يعطيه الحق انه يعلي صوته..
لكن ف نفس الوقت الواحد وده يكون محترم و يقدر الكل.. حتى لو كانوا هم الغلطانين!!
الله يجملنا دنيا و اخره..
"وبالنسبة للمحقق كونان وشخباري << اشفيهم الكويتيين؟ p:"
الكويتين اجدع ناس :)
ع فكره...الفايز الاول كويتي
:)
دمي بحفظ الله و رعايته
===================================
اختي سمو ال|أميره
الحمدلله نسيت الموضوع..
و الله يبارك فيك و عقبال فوزك ان شاء الله :)
"وادي الأمان .. و نوار .. وراوية .. والفرسان الأربع"
باااال...من قلب شخباري..
خخخخ
دمتي بحفظ الله و رعايته
سعيد بتواجدكم اخواتي
تحياتي
اختي فشّه..
اهلا بتواجدك الكريم هنا..
الله يبارك ف حياتك...الموقف عدى خلاص...لكن اتمنى اني اكون تعلمت :)
و المدارس!! ما نقول الا الله يعين
سعيد بتواجدك اختي
دمتي بخير
===================================
اختي وحيدة بلياهم
وصيت واحد من الشباب يعتذر لهم..
و الله يبارك فيك..
اما عن المناهج...ف من حرقة القلب...يعني جيل كامل يضيع عشان اختيارات خطأ....حرام و الله
:) حياك ع العشى "أمس " ف الشيراتون الساعه 8...لا تتأخرين هههههه :)
دمتي فحفظ الرحمن و رعايته
===================================
اختي سلة ميوه..
:)
احسك واحده من خواتي اللي اكبر مني " بس مو كبار ف السن" >>> عشان بعد لا نغلط في أحد مره ثانيه ههههه
لا خلاص نسيته....المفعول ليوم واحد بس...
عاد تدربي اهم شي ع الالقاء...و حافظي على هدوءك حتى لو نسيتي ايش تقولين..
و مع ابتسامه خفيفة على طووووول المحاضرة..
الله يبارك فيك
ما عطوني كاميرا :(
يعني لازم اشتري لي وحده...
سعيد دوما بتواجدك اختي الكريمة
تحياتي للجميع
مساء الخيـر ..
قضية المدارس المستقـله قضية ماادري متى بتنتهي ..
الطلاب انظلموا من هالنظام وكذلك المدرسين ..
الله المستعان ..
ماشاءلله متوفق الله يوفقك دنيا واخره يارب
هاذي تجربه واكيد تعلمت من هالمواقف صحيح محرجه مع بساطتها بس كل ماقابلت اكثر كل مازات خبرتك اكثر ^^ ..
..
هههه كوناان .! والله برامج التلفزيون عندنا عجيبه .. اذكر وحده تقول تلفزيون قطـر كأنه كتاب علووم !! خخ
دمت بكل الخيـر :)
اختي سكريبل
بالنسبة للتعليم فهي قضية لا تنتهي...
لكن مصيبة اهون من مصيبة..
الله يعين
و الحمدلله نسيت الموقف...و تعلمت منه ان شاء الله :)
حياك الرحمن
و دمتي بحفظ الله و رعايته
تحياتي
مدام طلعت من دون قصد
إنشالله ما تقعد بقلب احد ولا يشيلون عليك
انما الأعمال بالنيات
موفق , وسامحنا عالقصور
السلام عليكم
ماشاءالله واايد كااتب
وبصرااحه قريت البوست بس ع السريع
اول شي مبروووك لأختك ..وعقبالي لووول
حلو الواحد يرجع لايام المدرسه بس مب كـ طالب صغير لا كـ شخص كبير ..
ذكرتني يوم تدربت بالمدرسه ..
احس المعلمات صارن ربيعاتي ..وعلى ايام الدراسه من كثر ما كنا نحترمهن كنا نخاف نسولف وياهن!!
اماعن الموقفين بتكلم عن الموقف الثاني
امممممم بس انت مب قصدك وانت قلت بصوت خفيف واشرت بيدك ..
دامهم ضحكوا يعني فهموا انك سكته ..يمكن يحز فخاطره ..
ويمكن ما يهمه وينسى
ماتدري يمكن فيوم من الايام تشوفه وتعتذر له
اللي صار صار وان شاءالله مايحز فخاطر احد
بالعكس الطالب لازم يتقبل اي شي اذا يبا الفايدة
عااااد كونان صدق مغبر لووول ..اتصدق من متى نتريا الحلقه الاخيرة اظن بعدهم ماعرضوها
وتسلم على البوست ياخوي
اختي حافية القدمين
:) الحمدلله
شاكر تواجدك الكريم
تحياتي
========
اختي صمت
أمنيتي اني اشوف الحلقة الأخيره...ما اظن سوّوها اصلا !!
:)
حياك الرحمن
تحياتي
إرسال تعليق