سوالف ع السريع 2

بسم الله الرحمن الرحيم

اشلونكم؟ و شخباركم؟

اتمنى تكونون مرتاحين و بالف صحة و عافية..و بطاعة و خير..

هذا الأسبوع غريب...يا سبحان الله..

عزاء و را عزاء...

و مناسبة ورا مناسبة... و طبعا أداء الواجب حق بحكم معرفتنا لهم او لأحد منهم..

و على ما يقول أبوي.." كرامة و احترام للميت"

3 وفيات >> الله يرحمهم و يسكنهم فسيح جناته و يصبر أهلهم و يعيضهم خير..

و عرس >> اللهم بارك لهما و بارك عليهما و أجمع بينهما في خير..

يصيير هذا التناقض احيانا..ف يضطر الواحد يروح يعزي ناس..و مباشره..يروح يبارك لناس ثانية !!

** اتمنى ان نحتسب الاجر عند الله..و نؤدي هذه الواجبات من باب تلبية الدعوة و مشاركة الفرح| الحزن..

و مد يد العون....و تكون خالصة لله ان شاء الله..

===

موضوع الكتابة مازال معلّق..

و لا استطيع استثارة "قريحتي" >>> :) عاجبتني الكلمة..

أي حلول مقترحة؟؟

===

أمي تبي تكلم واحده من الاهل تسألها..

" بنتك..يبونها عيال عمها ؟!"

طالع!! ... يعني لازم هالحركات...

زين فرضا أنا ما أبي هالبنت..يعني بس عشان مرّه جبت طاريها..خلاص..صرت ابيها!!

زين ان خواتي امسكوها عن الاتصال...و لا كان انا الحين خاطبين لي و انا آخر من يعلم

====

معرض الكتاب بدأ..

أخذت كتاب للأستاذه " مستغانمي"..

و كتاب " البجعة السوداء"

طبعا لين اقراهم...الله اعلم متى..عقب باعطيكم رأيي فيهم :)

تنصحوني بأي كتاب| كتب ؟

==

دورة التصوير:

انتهت و لله الحمد..

ك تجربة اولى لي ف التصوير و ف الكاميرات الاحترافيه او الشبه احترافيه

جيده...عرفت اشلون اضبّط خيارات الكاميرا..و الاضاءة..عشان اطلع بالنتايج اللي أبيها..

و طلعت بكم صورة حلوه..لكني مصور بورتريه...ف ما اقدر احط صور الشباب

:)

===

تحملوا الركود اللي يعتري صفحاتي حاليا..

و أشكركم على الزيارة..

تحياتي