كم جمعتوا عيديه؟!!

بسم الله الرحمن الرحيم

و العيد فرحه..هي هي هي...و أجمل فرحة..هي هي هي

غنوا معانا العيد ده سعيد J

===============

قد يتساءل البعض عن عيدنا هنا..

طبعا لكل عيد طعم غير و مختلف..يعتمد اذا كان دوام..أو امتحانات..أو ويك اند

أو..أو..أو..

عيد الاضحى المبارك- اعاده الله علينا و عليكم باليمن و البركات- هذه السنة صدف ان يكون في اجازة ال

Thanks giving break

ف موضوع الدوام و الامتحانات ماراح يزعج الطلبة..لكن..

تصدقون اني من بدأت دراستي ف أمريكا ..و لا مرّه صليت صلاة العيد هنا!!

مع ان الوقت يكون نوعا ما متأخر ( الصلاه ع 7:45)

لكن استغفر الله اذا ماكان دوام..يكون نوم..و المنبه >> يتسكر و النومه تكتمل لين 10 او 11

اليوم لمّا رحت صلاة الجمعة...كان العدد قليييييييييييييييييييييل جداّ

استغربت..مع اني كنت متوقع اشوف الشباب

لأني ماظن بيقومون حق صلاه العيد عشان يكون عندهم عذر ما يصلون الجمعة..

المهم..رجعت شقتي..و قهوة ستار بكس بيدي..

و بدأت أسوي اتصالاتي عشان اروح للشباب ف عاصمة الولاية..

مريت ع المدونات..

و الإيميل >> لقيت ايميل من المدرس الكوري..بس للحين ما قريته هههه

و قضيت اليوم و كأنه اي جمعة لما اروح زيارة للشباب....يوم عادي

عزائي الوحيد..أن هذا بيكون اخر عيد لي ف الغربة..

بس للعلم...الأعياد اللي قبل كان فيها طعم و لون و رائحة...غير عن هذا العيد..

===

عيد من الأعياد...رحت السوق قبله بليله..و شريت هدايا لروم ميتاتي و اصدقائي

(روم ميت هو اللي يسكن معاك) و احنا كنا 3 ف شقة واحده

و شريت حق صديق مقرب...مممم اذكر كانت عباره عن ساعه و عطر لكل شخص..

و الصبح قمت أول واحد..و حطيت الهدية عن باب كل واحد فيهم..وناااااااسة

==

عيد آخر..

رحت و شريت لي بدلة جديدة >>> لزوم الكشخة يعني..

و طبعا انا اذا كان العيد في يوم دوام...أروح دوامي و حصصي >>> طالب مجتهد ما شاء الله علي..

و يبدا عيدي من بعد الدوام مباشرة..

عاد المعلمة اعجبتها بدلتي >>> اشوه ..حد لاحظ J

اخوي كان يدرس ف سوريا >> على ايامه كانت بعد تعتبر غربة ف راح أعده من المغتربين..

المهم..ف يقولي " لازم يوم العيد تاخذ لك شي جديد..لو حتى يكون ( الله يعزكم) دلاغ" سوري ع الكلمة...لكن

أنقل الخبر بمصداقية >>>>> الله يخلي الجزيرة اللي نتعلم منها...و موتوا يا عذّالنا..هههههههه

اتغشمر طبعا..لحد يوقف لي على هالكلمة..

ف من هالمبدأ...قمت كل عيد اكون فيه هنا..البس لي قطعة جديدة..تضفي ليومي و عيدي..طعما ما..

==

أنا نسيت أذكر شئ جدا مهم..

و هو ان العيد يبدا فعليا..ليلة العيد...يعني..

لما يكون النهار و الساعات الاولى من العيد ف قطر..يكون عندي الوقت ف الليل..قبل يوم العيد..

يعني العيد عندي بيكون بكره..

و تبدا المسجات..و المكالمات..و احساس ان الجو تغير..و في ريحة جديدة تتمشى ف الشقة J..

==

هذه هي السنة الأخيرة لي ان شاء الله

و راح اتخرج بحول الله في شهر 5-2010

و اذا قررت اني ما ادرس ماستر... بيكون عيدي الجاي ف قطر ان شاء الله..

ب غترة..و ثوب..و دهن عود و بخور..

و مروري على خواتي ف بيوتهم..و كل وحدة تسأل اذا كانت هي أحسن ضيافة و لبس..

و اليهال يجوني " خالي مب ماعطنا عيدية؟"

و أنا " ها؟!...أنتوا كم بتعطوني؟"

ف النهاية.... اعطيهم..و يكون في عينهم "قليل"......صج يهال هالوقت لا يعجبهم العجب..

و البنت منهم...تستحي تاخذ مني..يا زعم مب متعودين إلا من "الكبار" فعليا..

يا شينكم...توكم من سنة تلعبون كورة ف الحوش مع الصبيان!!

==

الله يديم السعادة ف قلوبكم...

و يكفيني أحساس أن في ناس مستانسة..و أحساس ان هلي متذكريني ف هاليوم..

و ينطرون مني اتصال او مسج..

و يكفي انه عيد ربي..

و فرحة مسلمين..

و فرحة أطفال...

كل هذا...يكفيني عشان أكون سعيد في يوم العيد..أيا كان مكاني..

عسى ايامكم كلها سعاده في سعاده..

تحياتي

راشد