ليش!!

بسم الله الرحمن الرحيم

هذي ثامن مرّة أودّع..و أقول مع السلامة..لكن ليش مازالت صعبة!!

ليش للحين أحس بالغصة و شوي و تبان بصوتي..

ليش للحين اذا جيت أحب يد أبوي و راسه..و عطيته ظهري و مشيت...الدمعة تزنطني..

اي...تزنطني..

يمكن عشان دعاءه

" الله يجعل لك البحر طريج...و العدو صديج"

ليش كل ما أقوم أمي..أقولها "يمّه..أنا بمشي الحين "..تفز من النوم..

و تجي توصلني لين الباب و الساعة للحين ما جات 6 الصبح..

"و ييه آمانة الله..يحرسك و يسمح دربك"

أختي تدعي لي..و تمسح على يدي و راسي و صدري..

و مازالت وصيتها..للمرة الثامنة..

" ما وصيك بدينك و صلاتك..الله الله...خل الله دوووم جدامك"

فديتهم خواتي...

و الله فديتهم...صج محد مثلهم..و صج صج..ازواجهم محظوظين فيهم..

عاد عسى ينقع فيهم هالازواج

" حبيبي..ترا ما احد طيب و مسكين في هالدنيا...تحمل بعمرك ..انت طيب..لا تخليهم يقصون عليك"

ههههههههه اشدعوه كم عمري..8 سنين!!

" يا الله الاجازة الجاية بنخطب لك" هههههه هذا هو نفس الوعد من أول مرة رحت فيها...

و وحده ثانية من خواتي..الصوت كله رقاد..

"ليش ما قومتني قبل لتطلع!!"

"لا و الله بس ما حبيت ايلسك الساعه 6 الصبح..."

" لا أصلا يالسه (واضح جدا).....يا الله حبيبي توصل بالسلامة و تحمل بعمرك"

بنات أخوي...وجلسة الشاي الاخضر معاهم..سلامي الاخير...

كلّه يتلون بلون ثاني...

أخواني بعد..

" اذا تبي شي او صار شي لا سمح الله كلمنا على طول"

"راشد...تعال شوي..." و يعطيني ميتين (مئتان ريال)

ههههههههه هذي جد ليش!!

أعتبر موظف..يمشي لي مرتب...تكلف على نفسك ليش..

ماقصرت و خيرك سابق يا اخوي...الله يطول باعماركم..غرقان من فضل الله ثم من فضلكم علي..

======

ليييييييييييييييييييييييييييييييييييييييييييييييييييييييييييييييييييييييييييييييييييييييييييييييش..ليش ليش..

أتم سهران ذيك الليله بروحي..

أطالع البيت..الصالة...أروح الغرفة...أمسك الطاولة..

و حتى و أنا اشرب الماي ف المطبخ الداخلي..أبتسم..

خطواتي الأخيرة ف الحوش..

يزين هالطوفة..و يا حلاة هالرطوبة..

و ما ادفا الشمس..

هدوء..

و مافي الا صوت خطواتي..

الله يحفظكم يا هلي...و الله يسعدكم و يفرحكم و يطمن قلوبكم..

استودعكم الله الذي لا تضيع ودائعه..و اشوفكم على خير يارب و انتوا بصحة و عافية..

==========

الوداع...

آخر حروفٍ...في خفوقي شلتها...

يا تموت..بوسط قلبي.......

يا أموت..إن قلتها.........

=========

يا الله...

مع السلامة..